UTI dal Friûl Centrâl, nuie di fâ pe aprovazion dal statût

“O speri che si superi cheste fuarte oposizion politiche su la leç par vie che, par ce che si à viodût, il statût nol è stât criticât di nissun dai sindics; o speri duncje che in curt si puedi tacâ a lavorâ, se di no al sarà une vore dificil di rispietâ lis scjadincis par chês altris ativitâts de UTI”. Al è il coment dal sindic di Udin, Furio Honsell, sopo che ancje vuê no si à rivât a fâ bon il statût de UTI dal Friûl Centrâl. Par che il document al passàs no jere avonde une maiorance semplice e cussì il vôt a pro dai Comuns di Udin, Pradaman, Puçui, Cjampfuarmit e Tavagnà nol è stât avonde a front dal vôt contrari dai Comuns di Martignà, Pagnà e Pasian di Prât e de assence di chel di Pavie. Su la fonde de leç regjonâl duncje al sarà cumò nomenât un comissari che al proviodi a fâ bon il statût de Union.