Dongje a partî i cors di natazion e di ativitât motorie dolce

Cui 14 di Setembar si vierzin lis iscrizions pai cors di natazion e par chei di ativitât motorie dolce inmaneâts dal ufici pal sport dal Comun di Udin che par cheste edizion a saran cressûts rispiet al an passât. I cors di natazion a son indreçâts ai fruts dai 4 ai 14 agns e a àn a disposizion 321 puescj dividûts su 15 turnis diferents che si davuelzaran tes pissinis comunâls di vie Ampezzo e di vie Pradamano e te pissine Tomadini di vie Martignacco a partî dai 5 di Otubar. Ogni cors al previôt 15 lezions, une par setemane, che il lôr program complet si lu cjate sul sît internet dal Comun , dulà che si cjatin ancje i modui par iscrivisi. Cun di plui, cun chest Autun, la pissine dal Palamostre i darà acet, in vie sperimentâl, ancje un cors di aquagym pai adults che a compagnin i fruts iscrits al prin turni de sabide. Par iscrivisi al è timp fintremai lis sîs sot sere (18.00) dai 16 di Setembar. Il cost dai cors al è il stes dal an passât e al va di 80,52 euros pes cuotis ordenariis ai 134,20 euros par cui che al è a stâ intun altri Comun. I citadins udinês cun certificazion Isee fin a 30 mil euros a àn invezit di paiâ dome 53,68 euros. Ai 14 di Setembar si inviin ancje lis iscrizions pe gnove stagjon dai cors di ativitât motorie dolce par adults che si davuelzaran dai 28 di Setembar ai 22 di Dicembar e che a previodin 24 lezions. I turnis a disposizion a son dîs, variâts par zornadis e oraris. Ogni cors al previôt dôs lezions par setemane. Vot lis palestris cjapadis dentri te iniziative: Zardini di vie Padova, San Domenico di vie Massaua, Carducci di viâl Tricesimo, D’Orlandi di vie Sabbadini, Vecchiatto di vie San Pietro, Zorutti di vie XXX Ottobre, 4 Novembre di vie Magrini, e Fermi di vie Pradamano. Il cost ordenari al è di 80,52 euros, che si sbasse a 67,10 euros par cui che al à plui di 65 agns. Par cui che al à une certificazion Isee che no passe i 30 mil euros il cost ordenari si sbasse a 53,68 euros e chel pes personis cun plui di 65 agns a 33,55 euros. Par iscrivisi al è timp fintremai vinars ai 18 di Setembar e al covente lâ alì dai sportei dal citadin de Seconde, Tierce, Cuinte o Setime Circoscrizion. Par ducj i cors al è l’oblic di puartâ un certificât medic di abilitât ae pratiche sportive no agonistiche.