Friuli Doc, presentât vuê il belanç finâl

“La formule gnove di Friuli Doc e à concuistât visitadôrs e operadôrs pe atenzion plui marcade pe cualitât e pe culture. Un sucès che al à di jessi un pont di partence par miorâ ancjemò di plui la manifestazion”. Al à vierzût cussì l’assessôr comunâl pe ativitâts produtivis e turistichis, Alessandro Venanzi, il belanç finâl de edizion numar 21 di Friuli Doc che al è stât presentât vuê dopodimisdì intant di une conference stampe a palaç D’Aronco. Il dât plui significatîf al è chel ufiert dai passe 100 esposidôrs che a àn aderît ae manifestazion e che a àn declarât di vê vût in medie un aument des venditis tor dal 20%. La gruesse partecipazion a Friuli Doc e ven fûr però ancje di fonts indiretis tant che il milion e 300 mil acès ae pagjine facebook di Friuli Doc, i passe 16 mil passaçs che si àn vûts intai autoparcs in struture e la incressite inte cuantitât des scovacis, là che aromai si à passât il 77% di diferenziade. Buine ancje la rispueste di fruts e fantats, cul dut esaurît dai laboratoris di cusine inmaneâts de Ludoteche e lis 310 partecipazions aes iniziativis dal Ludobus.