Gnûf progjet di educazion ambientâl pes scuelis

AcegasApsAmga e Comun e puartin ancje a Udin une propueste di educazion ambientâl pes scuelis pe infanzie, primarie e secondarie di prin grât. Il progjet, che al puartarà iniziativis didatichis sui temis leâts a aghe, ambient e energjie al rispuint al non de “La Grande Macchina del tempo” e al cjaparà dentri ducj i teritoris servîts dal grup Hera, cun passe 5 mil insegnants e cuasi mil scuelis. In graciis a chest progjet i docents a podaran sielzi tra propuestis che a van dal ambient (recupar, ricicli, prevenzion de produzion dai refudums) a aghe e energjie: si trate in dut di 27 sugjeriments gratuits. Daspò di vê cjapât vision dal catalic cu lis propuestis, presint in rêt ae direzion ragazzi.gruppohera.it ma ancje in version di cjarte alì de sede di AcegasApsAmga, i insegnants a podaran domandâ la partecipazion aes ativitâts. La iscrizion a varâ di jessi fate tal periodi dal 1 ai 31 di Otubar, jemplânt il modul in rêt simpri ae stesse direzion di pueste eletroniche. Lis rispuestis a vignaran butadis fûr dentri de fin di Novembar.