Dedicade a Provino e Gino Valle la Zornade dal cjaminâ

E sarà dedicade ai architets Provino e Gino Valle e ae lôr ereditât architetoniche la cuarte edizion de Zornade dal cjaminâ in program domenie ai 11 di Otubar. L’apontament, che si invie a nûf e mieze di buinore (9.30), al à tant che sît di partence e di rivade il parc Moretti. Ancje chest an, di fat, la Aministrazion comunâl e à decidût di aderî ae iniziative che e met adun sport e moviment cun parcs, storie e art. Il percors dilunc dai palaçs e dai monuments citadins leâts a Provino e Gino Valle al sarà compagnât dai coments dai architets Claudio Bugatto, Diana Calligaro, Sandra Cattaruzzi e Loredana Cecovic, dai associâts a Italia Nostra e di Mizzi Tentor de associazion Uoei. Par plui informazions si pues dâ un cuc al sît internet dal Comun (www.comune.udine.it) o contatâ il PuntoInforma di vie Savorgnane 12.