Comun e Ater adun par ricualificâ spazis a S. Svualt

Promovi progjets di ricualificazion e di riconversion funzionâl di spazis e di edificis dal cuartîr di Sant Svualt. Cun chest obietîf ancje il Comun di Udin al parteciparà, adun cu la Ater, ae taule su la rigjenerazion creative promovude de Associazion dai Comuns a nivel talian. Cu la sô adesion la Ater si rint disponibile a valutâ progjets di ricualificazion e di riconversion di ciertis struturis dal cuartîr par dâi acet a iniziativis di promozion de creativitât zovanîl. Si trate di 19 sîts tant che i orts urbans di vie Zugliano, l’auditorium Menossi, la palestre Vecchiato, lis scuelis a altris spazis fin cumò pôc doprâts. Ta cheste prospetive Comun e Ater a àn za sotscrit un pat par une propueste di intervent leade ae aree di vie Rivolto. La sielte di Sant Svualt, al à spiegât l’assessôr Pierenrico Scalettaris, e je leade al fat che si trate di un dai cuartîrs de citât cul aument demografic plui marcât e là che si àn diviersis areis dismetudis tant che la ex Safau e caserme Piave.