Personâl comunâl in vore a pro dai uficis judiziaris

Fintremai la fin dal an il personâl dal Comun di Udin al larà dilunc a lavorâ par judâ i uficis judiziaris citadins intes ativitâts di custodie, gjestion dai implants telefonics e telematics, e manutenzion ordenarie. Lu previôt une convenzion tra la Aministrazion comunâl, il Tribunâl e la Procure de Republiche firmade vuê, martars ai 13 di Otubar. A firmâ l’acuardi a son stâts il sindic di Udin, Furio Honsell, il president vicjari dal Tribunâl, Francesco Venier, il Procuradôr de Republiche, Antonio De Nicolo, e la magjistrade di control, Mariangela Cunial. Dal prin di Setembar lis spesis di tribunâi e procuris a son passadis dai Comuns al Ministeri de Justizie. Par garantî la continuitât dal servizi, duncje, la Aministrazion comunâl e i uficis judiziaris a àn inviât cheste convenzion che e larà indenant fintremai la fin di Dicembar dal 2015. Il cost des ativitâts davueltis dai dipendents dal Comun, che al sarà po rimborsât dal Ministeri de Justizie, al è di sù par jù 28 mil euros.