Presentât il servizi di polizie locâl di prossimitât

Une postazion mobile che e tocjarà, cun zornadis e oraris fis, 17 lûcs di Udin cu la pussibilitât di davuelzi sul puest ciertis pratichis ma ancje cuntune presince fisiche dai agjents intai diviers cuartîrs de citât. Chest, in struc, il contignût dal servizi di polizie di prossimitât che al è stât presentât joibe ai 22 di Otubar dal sindic Furio Honsell, dal assessôr pe inovazion Gabriele Giacomini e dal comandant de polizie locâl Sergio Bedessi. “Il Comun di Udin – al à comentât Honsell – al è daûr a sperimentâ ancje cheste gnove modalitât di presince e di servizi par sigurâ ai citadins plui vicinance e un sens plui grant di sigurece”. Il servizi al sarà davuelt in gracie di une stazion mobile indotade ancje des tecnologjiis informatichis plui modernis. Te stazion si podaran fâ e cjapâ sù segnalazions e ancje presentâ denunciis par piçui reâts o altri. Su la fonde di une analisi atente dal teritori a son stâts sielzûts disiesit sîts là che la stazion e cjatarà acet intal so percors ator pe citât. Lis areis interessadis a son chês di Godie, Beivars, Riccardo Di Giusto, Sant Gotart, Laipà, vie Pradamano, Baldassarie Basse, Cussignà, Sant Svualt, Sant Roc, Sant Domeni, Villaggio del Sole, Riçs, Ancone, Cjavriis, vie Montegrappa e Padier. La stazion mobile e sarà logade in parcs, viis, placis o sîts che a son ad ôr di lûcs là che là che la int si da dongje tant che scuelis, centris comerciâi o glesiis.