Delibaris de ultime riunion de Zonte comunâl

La Zonte comunâl e à fate buine inte riunion di îr la delibare pe concession dai contribûts par sbassâ i fits. Il 5% dai contribûts, daûr de leç regjonâl, al sarà risiervât aes personis cun mancul di 35 agns. Lis domandis a podaran jessi presentadis dai 25 di Març ai 29 di Avrîl. Par discjariâ e compilâ il bant al sarà a disposizion il Sportel Unic Informatîf servizis sociâi intal Centri polifunzionâl Micesio, dal lunis al vinars di 8.45 a 12.15 e il lunis ancje di 15.15 a 16.45. Dutis lis informazions si cjatin intal sît internet dal Comun www.comune.udine.it o pûr si pues clamâ i numars 0432 271731 e 0432 271732. La Zonte e à ancje fate buine la delibare pe concession dai contribûts a sogjets publics o privâts che a metin a disposizion pe prime volte alozaments a pro di personis che si cjatin in situazions di disasi. Lis domandis si podaran presentâ dai 25 di Març ai 29 di Avrîl ai uficis dai Servizis sociâi in viâl Duodo 77. L’esecutîf comunâl al à ancje fate buine la colaborazion dal Comun ae Prime Zornade europeane dal gjelât artesanâl che si davuelzarà in centri ai 23 e ai 24 di Març. Cun di pluil’esecutîf al à aprovât la adesion dal Comun a RE.A. DY , la rêt taliane des aministrazions publichis cuintri des discriminazions par orientament sessuâl e identitât di gjenar. Cun cheste delibare il Comun si impegne a sotscrivi la Cjarte che e fisse lis finalitâts, i compits e la organizazion de rêt, ma ancje a ativâ e a svilupâ ativitâts e percors formatîfs stabii tra la aministrazion comunâl e lis organizazions ativis sul teritori. La Zonte e à po fate buine la adesion dal Comun al Consorzi etic pe prevenzion dal ûs de droghe e dal abûs alcolic promovût de Anci e à decidût un contribût complessîf di 54 mil e 900 euros pes associazions che a operin in ativitâts che a àn finalitâts educativis. In fin, l’esecutîf comunâl al à confemât ancje par chest an la colaborazion cul Far East Film Festival, la rassegne dal cine orientâl in programe a Udin dai 19 ai 27 di Avrîl; pe manifestazion il Comun al darà un contribût di 85 mil euros.