Apontaments ae scuvierte de Joppi

“Alla scoperta della Joppi”. Cussì si clame la gnove iniziative, mensîl, che e ven organizade de Sezion manuscrits e rârs par fâ cognossi cualchi test e documents pôc cognossûts. Pal apontament di doman, joibe ai 29 di Otubar a 6 sot sere in sale Corgnali, a saran analizâts Caterina Percoto e Pietro Savorgnan di Brazzà, intun percors jenfri viaç e scriture. A tacâ di cualchi letare, scambiade jenfri lis dôs personis, si viodarà il rapuart tra i doi che, ancje se diferents par etât e sieltis di vite, a an mantignût un leam di amicizie, nassût dal jessi vicins di cjase. Lis letaris origjinâls, che vignaran mostradis dilunc de serade, a fasin part dal archivi Percoto, conservât inte Biblioteche Civiche.