Lavôrs par meti a puest la palestre de Manzoni

A son tacâts vuê, lunis ai 2 di Novembar, i lavôrs di ristruturazion de palestre de scuele secondarie di prin grât di place Garibaldi, intal complès “Manzoni-Stringher”, intervents che a permetaran di doprâ la vecje palestre des scuelis pe ativitât di zûc, pe didatiche, par alenaments e pe pratiche de bale a svol. Dut chest in gracie di une gnove pavimentazion omologade pe Fiba, de sostituzion di ducj i sieraments daûr des diretivis de sorintendence e de ricualificazion energjetiche dal sît. A saran fats gnûfs ancje l’impant des lûs, chel cuintri dai fûcs e il riscjaldament. Ae consegne dai lavôrs, che a àn un cost totâl di 400 mil euros, a jerin i assessôrs pe educazion, pal sport e pal stîl di vite Raffaella Basana e pai lavôrs publics Pierenrico Scalettaris, la dirigjente vicjarie dal III Istitût compensîf Nirina D’Angelo, i tecnics dal Comun e des societâts che a fasaran i lavôrs. I fonts doprâts a saran chei dal ministeri talian pes infrastuturis e pai traspuarts inte suaze dal program straordenari di intervents urgjents che a àn chê di prevignî e di ridusi il risi leât ae vulnerabilitât dai elements ancje no de struture tai edificis scolastics.