Il Wifi sore nuie al rive intes circoscrizions
Il wifi al rive in perifarie cun dîs ponts di acès in dutis lis circoscrizions. No dome chest, parcè che a tacaran subite ancje dai cors sore nuie par la alfabetizazion informatiche, pandûts ancje in colaborazion cun Insiel, propite par spiegâ ai citadins cemût doprâ la rêt e ducj i servizis digjitâi ufierts de aministrazion comunâl, cun l’obietîf di ridusi plui pussibil il digital divide.
Dut chest al è stât aprovât vuê, ai 10 di Novembar, de zonte comunâl su propueste dal assessôr ae Inovazion Gabriele Giacomini. “O vin vût voie di puartâ la rêt wifi ancje in ducj i borcs de citât – al spieghe – cun l’obietîf di disvilupâ in dute la citât puescj dulà conetisi sore nuie a internet e, al stes timp, tacâ un plan di alfabetizazion informatiche par i anzians e par ducj chei che a an voie di svicinâsi ae cognossince digjitâl e di ducj i servizis che il Comun al à bielzà metût a disposizion”.
Lis gnovis isulis digjitâls, ativis dal 30 di Otubar, a son metudis inte II circoscrizion (biblioteche e atri intal plan tiere), ae III (salon al prin plan), ae IV (sale riunion e biblioteche), ae V (auditorium e biblioteche), ae V (biblioteche e salon) e ae VII (biblioteche). “Intai prossims mês – al va indevant Giacomini – o tacarin cun la sperimentazion in cualchi circoscrizion, creant des piçulis aulis di informatiche sul teritori, dulà podê inviâ i cors di alfabetizazion doprant i computer metûts a disposizion dal Comun. O ringracii soreducj i conseîrs delegâts di cuartîr Mansi e Meloni e la assessore Nonino – al siere – par la atenzion a cheste tematiche e par il supuart in tiermin di consei e di colaborazion che an ufiert”.
Intai ultins agns, il Comun, in colaborazion cun i principâi operadôrs di telefonie, si è mot un grum par la estension de bande ultralargjie su dute la citât. Operazion che a metût Udin ai prins puescj in Italie par la cuvierture e estension de rêt internet. Dut câs, ancje te nestre Regjon, al reste un pont di criticitât, che al partìs de situazion dal Stât Talian. In Italie, di fat, la percentuâl di citadins che intai ultins 3 mês e a inviât o vût un document de Publiche Aministrazion “on line” al è dal 10,7% cuintri il 19,3 de Union Europeane, il 21,2 de France e il 32,3 de Finlande, metint il nestri paîs in font ae classifiche europeane. Devente necessari inviâ dai percors di informatizazion dedicâts ai citadins che mancul dispès doprin lis potenzialitâts de rêt. Un percors che al va a pari cun il slargjament de ufierte di ponts di acès internet sore nuie ancje intes circoscrizions che si zontin ai altris 33 hot-spot atîfs, simpri cun la rêt “Udinefree”, in dut il centri storic.