Gnove mostre al museu Archeologjic

Il museu Archeologjic dai Civics Museus di Udin, in colaborazion cun la Sovrintendince Archeologjiche dal Friûl Vignesie Julie, al propon un percors che, partint da lis scuviertis archeologjichis e dal patrimoni culturâl une vore siôr de citât, al fasarà viodi il mangjà, i libris e i rituâi dai nobii furlans jenfri Cuatricent e Cinccent. Si presente cussì “Mense e banchetti nella Udine rinascimentale”, la gnove mostre dal museu Archeologjic, che e sarà inaugurade joibe ai 12 di Novembar aes 6 di sere intal salon dal Parlament dal cjistiel. “E je une mostre che ricostruìs lis usancis e i costums peâts al mangjà inte Udin dal Cuatricent e Cinccent – spieghe l’assessôr ae Culture, Federico Pirone – Une iniziative che traviers di un percors archeologjic e conte la storie de citât e puarte valôr al nestri patrimoni artistic e sientific e ae ativitât di indagjin puartade indevant dal museu Archeologjic”. La esposizion, realizade in gracie dal jutori de fondazion Crup e di Unicredit, e sarà vierte al public in cjistiel fin ai 18 di Setembar dal 2016 di martars a domenie da lis 10 e mieze di matine fintremai lis 5 sot sere (intîr 5 euros, ridot 2,50 euros). Par informazions: Civics Museus dal Comun di Udin (tel. 0432 1272591 – www.udinecultura.it).