Il miôr de fotografie naturalistiche internazionâl in mostre

Udin si prepare a dâi acet ai scats plui biei de fotografie naturalistiche internazionâl che a divegnin di une selezion che e à cjapât dentri 25 mil fotos e 1.200 partecipants di passe une cincuantine di Stâts. Cun di fat, dal dì di Pasche, domenie ai 31 di Març, fintremai i 14 di Avrîl, la glesie di S. Francesc e ospitarà la esposizion dal Oasis Photocontest, il plui impuartant concors talian di fotografie naturalistiche e un dai plui impuartants a nivel european. L’event, proponût cu la colaborazion de riviste naturalistiche Oasis e dal Museu Furlan di Storie Naturâl, al met in mostre un otante fotos in formât grant, a tacâ di chês che si son plaçadis intes posizions miôr de selezion internazionâl. La mostre e je vierte dal martars al vinars cun orari 15.00 – 18.00, fûr che lis sabidis, lis domeniis e i dîs di fieste cuant che l’orari al va di 10.30 a 18.00. La jentrade e je libare.