Vie libare ae sistemazion ambientâl de ex gjave di là de Tor

La Zonte comunâl e à fate buine la delibare che e da il vie libare al intervent pe sistemazion ambientâl de ex gjave in localitât “Di là de Tor”. Il vôt dal esecutîf udinês al è rivât dopo dal parê positîf des aministrazions comunâls di Paulêt e di Remanzâs, de Provincir e de Regjon. “O metìn la peraule fin suntune cuistion vierte di agnorums – al spieghe l’assessôr comunâl pal ambient Enrico Pizza – e lu fasìn cuntune soluzion inovative: la gjave, fonde uns dîs metris, e sarà jemplade cun materiâi inerts e tiere in maniere di recuperâ une aree impuartante dal parc de Tor. Une volte jemplade la buse, si taponarà cuntun strât di tiere e si larà a semenâ plantis tipichis dai prâts vieris furlans”. Il progjet de discjarie, che si clamarà “Buse dai claps”, al cjape dentri dut câs dome une part de ex gjave, la part nordocidentâl de aree e sarà interessade dome di un intervent di restaur ambientâl.