Indenant la setemane di “Nassûts par lei”

E je tacade la XI “Setemane Regjonâl Nassûts par Lei”, progjet puartât in dute Italie e ideât de Associazion Culturâl dai Pediatis, de Associazion Taliane des Bibliotechis e dal Centri par la Salût dal Frut par fâ cjatâ fruts e libris te prime infanzie. Ancje tai prossims dîs e fintremai a domenie ai 22 di Novembar la biblioteche civiche “V. Joppi” di Udin, la sezion Fantats, lis bibliotechis di circoscrizion e lis librariis de citât che si son zontadis, a ospitaran tancj apontaments dividûts par etât. I incuintris e lis iniziativis laran indevant doman joibe ai 19 di Novembar a lis 5 sot sere inte biblioteche de cuinte circoscrizion a Cussignà e, stesse ore, inte librarie Ubik di vie Mercatovecchio. Simpri doman, ai 19, da lis 4 fin a lis 7, e je in program la gruesse novitât di chest an cun “Favole al telefono”, la linie direte de sezion Fantats cun i letôrs volontariis dal Club Tileggounastoria. Bastarà clamâ i numars 04321272748 o 04321272588 par scoltâ storiis e flabis vie telefon. No mancjin lis iniziativis par i gjenitôrs, par cui al è stât creât l’incuintri “Un mondo di libri: cosa e come leggere ai bambini prima della scuola”, organizât dal nît Ghirigoro di vie Caprera par sabide ai 21 da lis 10 fin a lis 11.30 (ingrès a paiament par 7 euros – prenotazions al tel. 0432237001 o par pueste eletroniche ae direzion fabianadallavalle@ghirigoro.it). Lis leturis par i piçui laran indevant sabide ai 21 aes 4 inte sezion Fantats de Joppi e aes 5 e mieze te librarie Feltrinelli di vie Poscolle e domenie ai 22, par finî, aes 5 sot sere, inte librarie Giunti al Punto in vie Vittorio Veneto.