Vinars fieste dai arbui cun 200 fruts des primariis

Ancje chest an il Comun di Udin al conferme la sô adesion ae Zornade dai arbui cul meti sot 26 plantis gnovis inte aree verde di vie Quarto. A plantâlis a saran passe 200 fruts des scuelis primariis Mazzini, Zorutti, Alberti e Nostra Signora dell’Orto judâts dal personâl dal Vert Public dal Comun. L’apontament al è doman, vinars ai 20 di Novembar. Si tache a nûf di matine dal parc Moretti, dulà che i fruts a saran impegnâts cu la racuelte des fueis. I arbui gnûfs a saran compagnâts di une cjarte di identitât cun test par talian e par furlan.