Cuintri de violence di gjenar al torne “Passi avanti”

Il Comun di Udin, intune cu la Comission pe paritât tra om e femine, al à inmaneât inmò une volte la iniziative “Passi avanti” che e met adun un program siôr di apontaments dedicâts ae Zornade internazionâl pe eliminazion de violence cuintri des feminis che e cole ai 25 di Novembar. Il calendari de iniziative, che si invie sabide ai 21 di Novembar, al previôt incuintris, cunvignis, presentazions, mostris, spetacui, events musicâi e altris apontaments svilupâts in gracie de colaborazion cun cetantis associazions impegnadis intal dî di no ae violence di gjenar. Cun di plui, dai 25 di Novembar, si inviarà une campagne informative metude adun de associazion “SeNonOraQuando” adun cun ConfCumierç che e previôt la distribuzion tes farmaciis e tes buteghis dai pancôrs di sacuts informatîfs cul numar gratuit antiviolence 1522.