Di cumò certificâts anagrafics ancje online

Il Comun di Udin, tra i pôcs a nivel talian, al à a pene ativât la pussibilitât di otignî online i certificâts anagrafics o di stât civîl plui frecuents. Di cumò indenant, duncje, si pues vê i certificâts vie Internet dopo vê ativât il servizi par mieç de tessare sanitarie. La ativazion si pues fâle alì dai uficis des Circoscrizions comunâls o ancje li dal URP de Regjon in Zardin Grant. Une volte ativade la tessare, al bastarà tacâ il letôr consegnât sore nuie adun cul pin, cjariâ il program e colegâsi al portâl regjonâl dai servizis (servizi.regione.fvg.it). Di chi si varà di lâ su la icone “anagrafe”, scrivi “Udine” sui certificâts in linie e fracâ su “vai” par acedi al servizi. Metudis dentri lis credenziâls di acès si podarâ discjamâ e stampâ il certificât che al interesse. Par chei là che covente la marcje di bol, si à di comprânt une e metile sul document stampât dopo vê metût il numar identificatîf de marcje te casele di pueste. Il progjet al nase de colaborazion tra Regjon, Insiel e il Servizi Sistemis Informatîfs dal Comun. “Il Comun di Udin – al à comentât il sindic Furio Honsell – si conferme indenant intai servizis inovatîfs pai citadins. In gracie di cheste pussibilitât, di fat, o larin dilunc pe strade de semplificazion e dal miorament dai rapuarts tra Aministrazion e citadin che, ta cheste maniere, al podarà fâ di mancul di lâ tai uficis publics e sparagnâ timp”.