Sì pe telegjestion dal implant di riscjaldament comunâl

Inte riunion di Zonte dai 16 di Avrîl, l’esecutîf al à dât il vie libare a diviersis azions che a àn a ce viodi cu la telegjestion dal implant di riscjaldament comunâl, cun novitâts inte toponomastiche citadine e cun facilitazions intal traspuart public. In particolâr, par chel che al rivuarde il prin argoment, il Comun al à chê di promovi un sisteme inovatîf di control des temperaduris intai edificis comunâi che al permeti di tignî di voli e miorâ la eficience energjetiche dai implants di riscjaldament e, di chê strade, di otignî ancje un sparagn energjetic impuartant. L’esecutîf al à cussì fate buine une convenzion tra Comun, Amga e istitût Bearzi par un intervent pilote di telegjestion dal implant di riscjaldament di Palaç D’Aronco. Un acuardi che al à un cost totâl sui 140 mil euros che a rivaran de variazion dal contrat di gjestion dal calôr cun Amga. Il progjet definitîf al varès di rivâ al Comun dentri de fin dal mês di Jugn; i lavôrs a varessin invezit di tacâ sul finî di Setembar par sierâsi po dentri dal mês di Novembar dal 2013.