Manifestazion pai 25 di Avrîl a Udin

Come ogni an, ancje chescj 25 di Avrîl, Udin al da acet ae manifestazion par celebrâ la fieste de Liberazion dal nazifassisim. La iniziative, inmaneade dal Comitât pe difese dal ordin democratic e des istituzions republicanis che al à tant che president il sindic de citât, e tacarà a 9.45 cun adunance in Zardin Grant (place Prin di Mai) par spostâsi po in place Libertât dilunc dal percors vie Puarte Gnove, Rive Bartuline, plaçute Marconi e vie Marcjât Vieri. A 10.30 su la jevade di place Libertât si varà la cerimonie de alcebandiere e si metarà jù une corone alì dal Templi pai muarts in vuere. Dopo l’intervent dal sindic, si larà indenant cu la leture de bande di trê students des motivazions che a àn puartât a assegnâ lis medaiis pal valôr militâr a Cividât, Tumieç e Udin. La orazion uficiâl e je stade afidade al poete Pierluigi Cappello, anticipât dal intervent dal rapresentant sindacâl Ferdinando Ceschia. A 11.30 la manifestazion si spostarà, dilunc des viis Cavour e Poscuel, fin in plaçâl XXVI di Lui par meti jù une corone alì dal Monument de Resistence e pai intervents conclusîfs di Giacomo Ponta, Luigi Raimondi Cominesi (ANPI) e Cesare Marzona (APO). A compagnâ la manifestazion a saran la Gnove Bande di Orçan, la Bande dal Mandament di Çarvignan e il “Coro Popolare della Resistenza”. La vilie de manifestazion e sarà segnade dai fûcs trats de culine dal cjistiel in memorie dai partigjans fusilâts intes presons di Udin ai 9 di Avrîl dal 1945. Ta chest câs, l’apontament al è a 9 di sere di miercus ai 24 di Avrîl.