Disponibil il video di Udin par furlan al Far East

Il progjet di comunicazion par furlan dal Comun di Udin al previôt ancje la valorizazion de lenghe in sîs dai events principâi che a interessin la citât cun trasmissions in direte su Radio Onde Furlane, speciâi televisîfs e su la cjarte stampade. Il prin dai events cjapâts dentri dal progjet al è stât il Far East Film Festival. Il video produsût ta chê ocasion, za lât in onde su Telefriuli, al è cumò a disposizion ancje su chest sît. Par viodilu baste cjalâ chi disot, da pît de colone des gnovis. Il prossim event là che il progjet di comunicazion dal Comun al puartarà la lenghe furlane al è Vicino / Lontano. Ta chê suaze, sabide ai 11 di Mai tra 9.30 e 11.30 di matine, e je in program une direte su Radio Onde Furlane cui protagoniscj de manifestazion che e varà tant che pont di emission il “Palazzo Contemporaneo”, o sei il spazi dentri dal palaç ex Upim recuperât tant che aree di culture a disposizion de citadinance.