Udin par furlan, event dal vîf par Vicino / Lontano

Inte suaze dal progjet di comunicazion “Udin par furlan” al è in program ancje un event dal vîf leât ae manifestazion Vicino / Lontano che e je daûr a davuelzisi ta chestis zornadis. Sabide ai 11 di Mai tra 9.30 e 11.30 si varà di fat une direte su Radio Onde Furlane che e varà tant che lûc di emission il “Palazzo Contemporaneo”, o sei il spazi dentri dal palaç ex Upim recuperât tant che aree di culture a disposizion de citadinance. Dentri di chel spazi a varan vôs la coordenadore di Vicino / Lontano Paola Colombo e un pôcs dai protagoniscj de manifestazion, simpri cun chê di dâi visibilitât ae citât, ai events che le caraterizin e ae lenghe furlane. In plui di chest moment dal vîf, si varà ancje un piçul speciâl televisîf che al sarà trasmetût su Telefriuli lunis ai 13 di Mai a 18.40 e po in repliche martars ai 14 di Mai a 22.30.