Presentade la gnove Zonte comunâl

Raffaella Basana, Cinzia Del Torre, Carlo Giacomello, Gabriele Giacomini, Simona Liguori, Agostino Maio, Antonella Nonino, Federico Pirone, Enrico Pizza e Alessandro Venanzi a son i dîs membris de gnove Zonte comunâl presentade miercus ai 15 di Mai dal sindic Furio Honsell. Si trate di une scuadre cuntune presince feminine impuartante e ancje zovine se si pense che la etât medie e je di 38 agns. Tal sielzi i nons o ai tignût cont dal consens otignût cu lis preferencis, ma ancje de paritât di gjenar e des competencis – al à spiegât il prin citadin – e, rispiet ae legjislature stade, al è cressût il pês des deleghis leadis aes personis a pet di chês pes infrastruturis, in maniere coerente cu la suaze di recession economiche e cu la limitazion des emergjencis che indi vegnin fûr. A son ancje des sorpresis – al zontât Honsell – tant che lis deleghis pal abitâ sociâl e pe architeture des politichis publichis in maniere di svilupâ progjets e iniziativis a misure di citadin. La cjarie di vicesindic e je lade a Agostino Maio che al à lis deleghis par Lavôrs publics, Edilizie privade e Manutenzions. L’unic assessôr che al jere za inte Zonte stade al è Enrico Pizza che al cjape in man Mobilitât e Ambient. Ae Culture al è rivât invezit Federico Pirone che al à ancje lis deleghis par Turisim culturâl, Pâs e Ativitât culturâl pai zovins. A Gabriele Giacomini i son ladis lis deleghis par Inovazion e trasparence, Studis e statistiche, Verifiche dal program, Lavôr e svilup economic, Comunicazion e ufici relazions cul public, Universitât e Ricercje. Cinzia Del Torre e viodarà di Belanç e Personâl, in plui de Paritât tra om e femine. A Simona Liguori, oncolic dal distret sanitari di Udin, i son stadis assegnadis lis deleghis par Salût e Ecuitât sociâl. Antonella Nonino e je assessore pai Dirits di citadinance, pes Lenghis minoritariis, pe Anagrafe, pal Decentrament e pal Abitâ sociâl. Carlo Giacomello si ocuparà di Urbanistiche, Patrimoni e Demani, Agjende 21, Gjestion dal teritori e Locazions. A Raffaella Basana a son stadis dadis lis deleghis par Servizis scolastics, Nîts, Problematichis socioeducativis, Sport e Centris di agregazion pai zovins. Alessandro Venanzi al à vudis lis deleghis par Cumierç e Turisim cul compit di svilupâ ancje un dai progjets plui impuartants di chest mandât, o sei il centri comerciâl naturâl. Il sindic Honsell al à tignût in man Partecipadis, Progjets Europeans, Polizie municipâl, Avocature, Control di gjestion e programazion strategjiche, Ambit, Rapuart cui Comuns dulintor, Rapuarts cu la aziende sanitarie, Certificazions Emas e energjie 202020. Il prin citadin al à decidût po di dâi in man altris deleghis ai conseîrs comunâi Franco Della Rossa (Anagrafe e Toponomastiche) e Pierenrico Scalettaris (Citâts zimuladis).