Incuintris par lâ plui a fonts su la disabilitât

E je tacade cu la associazion “ProgettoAutismo FVG Onlus” la schirie di incuintris che la assessore comunâl pes politichis sociâls e pe sanitât Simona Liguori e à volût inviâ par cognossi plui di dongje lis problematichis che si cjatin a frontâ lis fameis là che a son personis che a patissin di cualchi forme di disabilitât. La riunion, che si è tignude cu la partecipazion ancje dal vicesindic Agostino Maio, e je stade duncje la ocasion par scoltâ la testemoneance e i sugjeriments di une realtât che di agns e viôt di fruts autistics. Sodisfate pal incuintri la presidente de associazion Elena Bulfone. “O vin indicât ae assessore lis prioritâts e lis dibisugnis des personis autistichis e des lôr fameis che si cjatin in situazions di grant disasi; ta cheste suaze – e à spiegât la presidente di ProgettoAutismo – al è une vore impuartant sensibilizâ la int, judâ i pediatris a ricognossi i prins sintoms e indreçâ i câs suspiets alì des struturis specializadis in diagnosi e in terapie”.