Progjet pilote di sparagn energjetic a palaç D’Aronco

Il Comun al inviarà in curt un progjet pilote par un model gnûf di gjestion dai implants di riscjaldament che al permetarà di tignî di voli e otimizâ la eficience energjetiche. Un model che, dopo dal palaç dal Comun, si vûl slargjâ ancje a chei altris edificis comunâi e a chês struturis storichis là che al è plui dificil intervignî in maniere struturâl. Su chestis fondis si à sotscrite une convenzion tra il Comun, la Amga e l’istitût Bearzi che si riferìs a progjetazion, realizazion e jutori tecnic di un sisteme autonom di telegjestion dal implant di riscjaldament di palaç D’Aronco. Dilunc vie dal Astât 16 tra professôrs, colaboradôrs e students dal Bearzi a lavoraran cun contrats a progjet e cul coordenament dai tecnics de Amga par fâ sù un sisteme inovatîf di control des temperaduris dentri dal palaç dal Comun che al permetarà di intervignî stanzie par stanzie. Ta cheste maniere si varà un sparagn energjetic dal 10% rispiet a di une spese che ogni an e je sui 300 mil euros, cence dismenteâ la riduzion dal incuinament. Sul progjet a saran metûts 160 mil euros: 140 de Amga e 20 dal Comun.