Stîi di vite sans, protocol di intese tra Comun, ASS e Uisp

Promovi stîi di vite atîfs de bande di dute la citadinance; meti jù un plan di ufierte di ativitâts motoriis indreçât a dutis lis categoriis, massime chês plui debilis; sburtâ iniziativis che a judin a rivâ a di une cundizion miôr di benstâ psichic, fisic e sociâl. A son chescj, in struc, i obietîfs dal protocol di intese trienâl tra Comun, Aziende pai servizis sanitaris n. 4 dal Friûl di Mieç e Comitât provinciâl Uisp (union sport par ducj) fat bon vuê de Zonte comunâl. Adotâ stîi di vite corets al jude a prevignî malatiis – al à spiegât il sindic Furio Honsell – e al jude a invecjâ in salût, un aspiet impuartant massime intune realtât come chê di Udin là che une persone su cuatri e à plui di 65 agns. Lis azions previodudis dal protocol si metaran in vore cul sisteme dal lavôr par progjets di svilupâ ancje su plui agns e cuntune modalitât in rêt che e puarti a lavorâ adun ents, istituzions, organizazions e associazions che a operin in citât.