“Furlan in Comun” in rêt ancje cun gnovis e iniziativis

Di un pôcs di mês incà a Udin il furlan al è une lenghe “in Comun”. In graciis dal sportel linguistic “Furlan in Comun” la lenghe furlane e ven doprade di plui dal Comun tai siei rapuarts cui citadins e a jessi metude “in comun” tant che mieç di comunicazion, imprest di informazion e strument di dialic e partecipazion civiche. In cheste suaze il Sportel linguistic al à viert un so barcon inte rêt. Dentri dal sît internet dal Comun si cjatin diviersis pagjinis di pueste dulà che a son a disposizion lis informazions di servizi leadis al Sportel, ma ancje une schirie di gnovis che a tocjin la lenghe e la culture furlane, il teritori de citât e dal Friûl, e altris cuistions di atualitât. La pagjine di vierzidure di “Furlan in Comun” si le cjate achì là che, dongje dal benvignût intal sportel virtuâl , si cjatin informazions sul servizi e la sezion dedicade a Gnovis, events e iniziativis.