Ai 29 di Jugn vierzidure straordenarie de Ludoteche

Par fâ fieste pai siei prins 14 mês di ativitât, la Ludoteche e à programât une vierzidure straordenarie sabide ai 29 di Jugn di 4 a 7 dopodimisdì (16.00 – 19.00) e di vot e mieze a undis e mieze di sere (20.30 – 23.30). In plui des ativitâts che si puedin fâ par solit, intai locâi di vie del Sale, si podarà partecipâ a di un torneu di Blokus e provâ dai zûcs di taule gnûfs cun Academy Games. Tai zardins li dongje, invezit, si podaran viodi i lavôrs fats dai fruts dai doposcuele udinês e ispirâts ae opare di Keith Haring. Simpri intai zardins del Torso, a 9 di sere (21.00), si varà la conference “Non capisco un cubo” tignude dal sindic Furio Honsell. Vie pal Astât la Ludoteche e restarà sierade, ma e tornarà a vierzi cui 3 di Setembar cun ativitâts e zûcs gnûfs.