Indenant la distribuzion de Cjarte Zovins

E va indenant la campagne dal Comun pe distribuzion a gratis de Cjarte Zovins che e permet a fantats e fantacins tra i 14 e i 29 agns a vê facilitazions e sconts in buteghis, centris sportîfs, palestris e centris culturâi sei a nivel locâl che internazionâl. Par solit la Cjarte e coste 11 euros, ma e je sore nuie pai zovins residents in comun di Udin in gracie di une iniziative promovude de Provincie. Par vêle baste lâ alì dal servizi Informagiovani di viâl Ongjarie 39 che al è viert tai dopodimisdîs dal lunis ae joibe di trê a sîs (15.00 – 18.00), lis matinis di martars e miercus di dîs a misdì e mieç (10.00 – 12.30), e il vinars a matine di dîs a une (10.00 – 13.00). Par otignî la tessare baste presentâsi cuntun document di identitât valit, cuntune foto tessare e, tal câs dai frutats cun mancul 18 agns, cuntun gjenitôr. Par informazions e sclariments baste telefonâ al 0432 292329.