Vie libare de Zonte comunâl al centri comerciâl naturâl

Inviâ azions par promovi il svilup socioeconomic dal centri storic de citât, miorâ e ricualificâ lis infrastruturis, promovi la cualitât de ufierte comerciâl, recuperâ identitâts toponomastichis e itineraris storics e artistics dal centri, e promovi events par incressi l’atrat di cheste part de citât. A son chescj i obietîfs che a son daûr dal “Centri comerciâl naturâl” che la Zonte comunâl di Udin e à fat bogns cuntune delibare che e rapresente il prin pas pe nassite di cheste gnove realtât che si poiarà su doi struments. Di une bande un organisim strategjic là che, dongje dal Comun, a saran dentri la Cjamare di Cumierç, la Universitât, la Soreintindince, lis associazions di categorie, operadôrs economics e residents. Chel altri strument, che al varà non “UdineIdea”, al sarà une associazion di privâts che e davuelzarà la funzion di braç operatîf. Il pont di fuarce dal progjet – al spieghe il vicesindic, Vincenzo Martines – al è propit intal fat di vê cjapât dentri la Cjamare di Cumierç e lis categoriis economichis za te fase progjetuâl. Il plan al previôt ancje l’ûs di fonts europeans par finanziâ servizis inovatîfs sei sul plan de mobilitât, sei sul plan dai servizis ae persone. Il teme dal “Centri comerciâl naturâl” al sarà ancje l’argoment di une cunvigne in program lunis ai 3 di Dicembar in sale Ajace.