Presentâts i prins apartaments domotics in citât

A son pronts i apartaments domotics di Udin ristruturâts inte suaze dal progjet Re-freedom, o sei Rêt funzionâl pe ricercje e pe sperimentazion di servizis inovatîfs pe domiciliaritât, che vuê di buinore a son stâts presentâts ae stampe e a di une delegazion de aministrazion comunâl vuidade dal sindic Furio Honsell. Cun di fat il progjet al è promovût dal Comun di Udin, de Rino Snaidero Scientific Foundation e di Friuli Innovazione, e cofinanziât de Regjon. L’intindiment al è chel di promovi la cognossince e la tecnologjie par miorâ la cualitât de vite in cjase par anzians e disabii e permetiur di evitâ o di ritardâ il plui pussibil la strade de cjase di polse. I apartaments ristruturâts, che a son doi, a son pensâts massime par personis cun disabilitâts motoriis e a saran cumò un lûc par testâ la validitât des tecnologjiis e des soluzions proponudis.