Protocol pe inclusion sociâl dai presonîrs

Promovi un tratament carcerari uman, no discriminatori e che al rispieti la dignitât individuâl di cui che si cjate in preson, in esecuzion penâl esterne o a disposizion de autoritât judiziarie minorîl. A son lis finalitâts dal protocol di intese par definî i percors di reinseriment e di inclusion sociâl a pro des personis che si cjatin a disposizion de autoritât judiziarie. Protocol che al sarà firmât miercus ai 3 di Lui a misdì a Palaç D’Aronco (Salon dal Popul) cu la partecipazion di ducj i sogjets impegnâts intal progjet, ven a dî, in plui dal Comun, la Aziende pai Servizis Sanitaris dal Friûl di Mieç, la cjase circondariâl di Udin, l’Ufici di esecuzion penâl esterne di Udin, Pordenon e Gurize, il Servizi sociâl minorîl di Triest, la Provincie di Udin e 14 associazions ativis sul teritori.