Il Comun al à inviât la “Agjenzie de famee”

E nas la “Agjenzie de famee” dal Comun di Udin: un progjet che al ponte a superâ il welfare assistenziâl par imbastî une rêt ative cul teritori pai jutoris, sei economics sei in servizis, aes fameis. L’obietîf dal progjet, che al è stât presentât dal sindic Furio Honsell e dal assessôr pai servizis sociâi Antonio Corrias intune cul president dal “Forum associazioni familiari Fvg” Giancarlo Biasoni, al è dopli: miorâ la cualitât dai intervents publics e privâts cun formis di integrazion e di coordenament, e imbastî rêts e aleancis tra i diviers sogjets dal teritori. Tra lis azions inviadis dal grup di lavôr che al à metût adun il progjet si à rapuart des diviersis formis di jutori dadis aes fameis di Udin vie pal 2012 (a ‘nd è stadis censidis cuasi novante), un percors che al puartarà a riviodi la Isee e une vuide aes risorsis e ai servizis pes fameis. Plui indenant si previôt ancje la nassite di un portâl teritoriâl des fameis che al permetarà di vê informazions simpri inzornadis sui jutoris e sui servizis a disposizion su chest cantin. Il progjet e lis ativitâts inviadis a saran presentâts ai citadins e aes associazions joibe ai 29 di Novembar.