Vie libare de Zonte al regolament pes antenis

Cul passaç inte riunion di Zonte dai 2 di Lui, al è partît il percors par regolamentâ la distribuzion des antenis di telefonie mobile sul teritori dal Comun di Udin. Il test al passarà cumò pal tamês de Sorintendence regjonâl pai bens architetonics e po in Comission teritori e ambient prime di jessi fat bon dal Consei regjonâl. Intal regolament a son dentri sei lis areis miôr par meti jù implants gnûfs, sei chês là che no si podarà fâlu. In dì di vuê sul teritori dal Comun a esistin za 120 implants, ma cumò la necessitât e je chê di svilupâ la gnove tecnologjie 4G (di cuarte gjenerazion). Par chest i gjestôrs a àn domandât di meti jù 48 antenis gnovis e il Comun al à metût a disposizion vincj sîts logâts intes viis Liguria, Cividale, Redipuglia, Monte Coglians, San Daniele, Caccia, Cairoli, Micesio, Gorghi, Galliano, in place Patriarcjât, in viâl Palme, alì dai implants sportîfs Rigo, ex Gil, di vie Cormôr Bas, di vie S. Margarite, di Laipà e di Godie/Beivârs, tai cimitieris di Cussignà e di vie Emilia. Cundut che il progjet al à za vude une fase partecipative, prime che il regolament al rivi in Consei comunâl – al à spiegât l’assessôr pal ambient Enrico Pizza – al sarà publicât sul sît internet dal Comun par che ducj a puedin dâi un cuc.