Ai 8 di Lui e tache la gnove edizion di CineInCittà

E je pronte par partî la gnove stagjon di “CINEinCITTÀ”, la rassegne cinematografiche che e cjape dentri lis circoscrizions e che chest an e propon un program di dodis films jessûts dilunc vie de ultime stagjon tant che “Lincoln”, “Anna Karenina”, “Skyfall”, “Vita di Pi” e vie indenant. Si tache lunis ai 8 di Lui par rivâ insom lunis ai 12 di Avost, cun orari nûf e mieze di sere (21.30) intal mês di Lui e nûf (21.00) in Avost, e simpri sore nuie. Lis proiezions a interessaran cuatri arenis logadis inte aree verde di viâl Divisione Garibaldi Osoppo, intal sagrât de glesie di S. Pio X, inte aree verde Robin Hood di vie Pirona, e tal implant Sergio Brun di viâl Vât.