Presentât il program de Gnot Blancje dai 11 di Lui

E je stade presentade vuê di buinore la edizion 2013 de Gnot Blancje in program a Udin ai 11 di Lui, vilie de fieste dedicade ai sants Macôr e Fortunât patrons de citât e dal Friûl. A presentâ il calendari des iniziativis a son stâts il sindic Furio Honsell, i assessôrs Alessandro Venanzi e Federico Pirone, e il president de Associazion centri comerciâl naturâl UdineIdea Gianni Croatto. La Gnot e tache adore li dal Visionario, a 5 e mieze sot sere, cu la proiezion de comedie di Henry Koster “Harvey”. Stes lûc, ma a 7, pal conciert di In-Tune Vocal Quartet. Art e storie a son protagonistis di percors che a tachin a 6 e mieze. Al è il câs de visite didatiche ae mostre “Prima e dopo i Tiepolo”, che e je in Domo, e dal itinerari su la storie des cjasis de comunitât di Udin (informazions e prenotazions: www.itinerariafvg.it). A 9 di sere a Cjase Cavazzini presentazion dal libri “Ivan Moudov. Rave 2012” e de opare “Stones”, a tachin po lis visitis vuidadis (par savênt di plui: www.didatticamuseiudine.it), intant che a 10 si presentin i cinc videos fats di Ila Bêka e Louise Lemoine. Pe Gnot Blancje a restaran viertis fintremai a miezegnot ancje lis mostris che a son in pîts a Udin in chestis setemanis, a tacâ di chês a Palaç Morpurgo (Riccardo Toffoletti: un mondo alla rovescia), te glesie di S. Francesc (Italian.design.ud), in Biblioteche (Boccaccio nei libri) e te Galarie Modotti (Carlo Leidi – Cina 1972). La Gnot Blancje e tocje ancje il Borc di Greçan, cun doi events dal cartelon “Teatro S. Giorgio Estate_a km 0”: “Puls(t)azioni” cun Erica Mattioni, Giulia Marcelli, Riccardo Fiore e “Perhaps nothing can be completely destroyed” cun Lorenzo Missoni, Barbara Stimoli e Alessandro Ruzzier. La musiche e sarà protagoniste in formis diferentis: i Scampanotadôrs Furlans a sunaran lis cjampanis dal Domo a 8; une ore plui tart, in place Libertât, i tocjarà ae F.V.G. Mitteleuropa Orchestra presentâ un omaç al tango di Astor Piazzolla, intant che la seconde part de serade e sarà dedicade al rhythm’n’blues cul conciert dal grup di Luca Roncadin; invezit a 9.30 in place S. Jacum apontament cun Folkest e cu la musiche di Mimmo Cavallaro e Cosimo Papandrea. Diviers po i laboratoris pai fruts: si va de Pinacoteche dal Cjistiel fintremai ae Ludoteche e ai zûcs in Marcjât Vieri e in Place dai Grans. Il program complet si pues cjatâlu sul sît www.comune.udine.it . Par cui che al rive a Udin in machine, di nûf di sere a une di gnot, e je la pussibilitât di lassâle sore nuie intai autoparcs Magrini, Andreuzzi, Caccia, Moretti, Venerio e dal Tribunâl.