Autoparc sot tiere di Zardin Grant, mancul volums a viste

Un at di oblic formâl al è stât sotscrit di Comun, Sorintendence e Ssm cun chê di rivâ a di une condivision dai aspiets architetonics e dal paisaç leâts al autoparc sot tiere che si vûl fâ sù in Zardin Grant (aree ex Esso), almancul par chel che al rivuarde i volums dal progjet che a son a viste. In pratiche, al à spiegât il sindic Furio Honsell, si vûl gjavâ i volums esternis dal progjet. Plui in detai chest al vûl dî che la bilietarie e sarà logade tune cjasute li dongje che e sarà restaurade, e a restaran in viste dome i cuarps di servizi tant che lis scjalis di sigurece previodudis par leç che a saran però fats sù cul minim impat ambientâl. Si vûl cussì garantî une integrazion miôr dal progjet inte suaze urbane storiche de citât.