Convenzion gnove pal servizi sociâl dai Comuns dal Ambit

Promovi il svilup vualîf dai servizis pal teritori cul cressi la capacitât di rispueste di ogni singul Comun aes dibisugnis dai citadins. Sigurâ servizis sociâi di cualitât, ma ancje svilupâ economiis di scjale par otimizâ lis risorsis economichis, finanziariis e umanis, in plui di garantî un colegament miôr tra lis decisions politichis e la lôr traduzion in fats. A son dome un pocjis des finalitâts previodudis de “Convenzion istitutive dal Servizi sociâl dai Comuns” dal Ambit dal Udinês, firmade dal sindic dal Comun di Udin, Furio Honsell, e dai prins citadins dai vot Comuns dal Ambit, o sedi Cjampfuarmit, Martignà, Pagnà, Pasian di Prât, Pavie, Puçui, Pradaman e Tavagnà. L’Ambit udinês al è l’unic de regjon a vê decidût pe firme di une gnove convenzion, invezit di sprolungjâ chê di prime cemût che a àn fat chei altris. La convenzion, che e durarà cinc agns, e fisse i intervents, i servizis e lis ativitâts dal Servizi Sociâl dai Comuns. Si va di azions tant che il servizi sociâl professionâl, intervents di assistence economiche, pront intervent sociâl pes situazions di emergjence personâls e familiârs, fin ai servizis di assistence domiciliâr. Tancj ancje i intervents, simpri curâts in forme associade dai Comuns, che a rivuardin fruts e zovins, la famee e i anzians.