Comun tra i virtuôs de racuelte diferenziade

Ancje Udin al è dentri inte liste dai Comuns de provincie di Udin che a riciclin di plui e, pe prime volte, al gjolt dai incentîfs che la Provincie e da a chês aministrazions là che la racuelte diferenziade e passe il 50% dal totâl. Al Comun di Udin i rivaran cussì 10 mil 958 euros che al coventarà par comprâ pôc mancul di 2.500 tanichis di 5 litris pe racuelte dai vuelis vegjetâi di cjase. Intai prossims mês lis tanichis a saran dadis fûr sore nuie e fin che a ‘nt sarà a ducj i residents che lis domandaran ae Net che in curt e fasarà savê i timps e i mûts de distribuzion.