250 mil euros di incentîfs de eficience energjetiche

A son novante lis oparis publichis fatis dal Comun intai ultins cinc agns che i permetaran ae aministrazion comunâl di gjoldi di incentîfs, par mieç dai Titui di eficience energjetiche (Tee), par uns 250 mil euros. Te sô riunion di vuê la Zonte comunâl e à dât mandât ai uficis di inviâ il percors che al puartarà a trasformâ i lavôrs fats in Tee o “certificâts blancs” che a saran po scambiâts suntun marcjât specific che al varès di permeti di otignî sù par jù 250 mil euros di incentîfs, sparniçâts su vot agns. Tra i intervents che a àn permetût di rivâ a di chest risultât o cjatìn la sostituzion des lampadis des lûs publichis cun led, l’isolament des parêts e dai cuvierts, l’implant di panei solârs termics pe produzion di aghe cjalde, la sostituzion di veris sempliçs cun veris doplis e v.i.