30 mil intervents dai servizis sociâi vie pal 2012

Dilunc vie dal 2012 a son stâts sù par jù 30 mil i intervents fats dai servizis sociâi par sostignî fameis, anzians, disabii o personis a risi di esclusion sociâl. La aree di intervent plui impuartante e je chê des politichis pe famee, cun contribûts economics pes fameis cun minôrs e par chês numerosis, i bonus pai frutins a pene nassûts e i assegns di natalitât regjonâl, e in fin i servizis de cjarte famee. Diviers ancje i intervents e i contribûts pes personis indenant cui agns, dulà che si va dai abonaments facilitâts pal traspuart public ai contribûts par sbassâ lis spesis pes struturis residenziâls, dai centris diurnis al servizi di scolte. A son cetancj ancje i intervents par judâ lis personis a risi di esclusion sociâl e chês cence cjase. Juste par fâ un esempli, tal 2012 il Comun al à contribuît aes spesis pe ospitalitât di 130 personis intal centri di acet “Il Fogolâr”. Un altri cjamp di intervent al è chel des misuris par fâi cuintri ae emergjence abitative, dulà che la plui part dai contribûts e je lade pal font pai afits, cun 1,5 milions di euros par 1.876 domandis e 40 mil euros pe cuote comunâl dal font sociâl Ater. Cuintri de puaretât la aministrazion comunâl e à metût fûr l’an passât passe 476 mil euros di contribûts, 30 mil euros pes borsis lavôr pes personis in dificoltât, 25 mil euros pe mense sociâl de Caritas e 186 mil euros par associazions dal tierç setôr.