Vie libare de Zonte a intervents di ricualificazion urbane

La Zonte comunâl di Udin e à fat bon il progjet preliminâr dai lavôrs di ristruturazion dal sede de Tierce circoscrizion, in viâl Forze Armate. Il plan dai intervents al previôt di fa sù une gnove sale pes riunions che e tignarà fin a 25 personis, di meti in sest i spazis de biblioteche e i servizis. Pai lavôrs a saran spindûts 130 mil euros. L’esecutîf al à fat bon ancje il progjet preliminâr dai lavôrs di ricualificazion dal implant di riscjaldament dal imobil dulà che a son logâts lis oficinis, i uficis e i camarins dal servizi pes manutenzions diretis in vie Joppi. La Zonte à po dât il vie libare al progjet pe costruzion des tribune cuvierte intal implant sportîf di viâl dal Sport. La opare e sarà fate sù intal Astât di chest an che al ven, pai lavôrs a saran spindûts 300 mil euros. A saran invezit finîts dentri de Vierte dal 2013 i intervents in vore par fâ sù i camarins gnûfs e par ricualificâ l’implant sportîf. Cun di plui al è stât fat bon il progjet definitîf pai lavôrs di costruzion e di manutenzion dai marcjapîts e des pistis ciclabilis intes viis Monte Rombon, Palestro, Martignacco, Chiusaforte e dai colegaments tra lis viis Martignacco, Cotonificio e Pieri cuntun invistiment complessîf di 500 mil euros.