Zornadis di formazion su la certificazion energjetiche

Inte suaze dal progjet european “CEC5”, la Agjenzie comunâl pes politichis ambientâls e je impegnade ta chescj dîs intune schirie di zornadis di formazion sui temis de certificazion energjetiche dai edificis che a son pensadis massime pai professioniscj dal setôr e che a coventin par fâ il pont su la normative cumò in vore. Chest percors formatîf al previôt ancje diviersis visitis tant che chês in program vuê alì de centrâl di trigjenerazion dal Terminal Nord, de Cjase dal student dal centri universitari dai Riçs, e de scuele pe infanzie di vie Baldasserie Medie. Lis zornadis di formazion a son ancje la ocasion par presentâ il cussì clamât “protocol Cesba” o sei l’imprest comunitari che al sarà doprât pe diagnosi de sostignibilitât ambientâl e energjetiche dai edificis. La aministrazion comunâl e à za in program intai prossims mês altris ocasions di formazion e di informazion indreçadis ancje a di un public no di tecnics. Il progjet european, dut câs, in plui di chestis iniziativis al jude ancje intervents direts. Cussì, dai 455 mil euros di fonts comunitaris otignûts dal Comun di Udin ta cheste suaze, sù par jù 300 mil a saran doprâts pal recupar cun criteris sostignibii dal ex Macel.