Garantide la ativitât dai centris pai zovins

“No si à mai pensât nancje par lontan di sierâ i centris pai zovins dal Comun di Udin. Di là dal sprolungjâ il servizi, che si veve za decidût di lâ dilunc a garantî, i temis che si è cumò daûr a frontâ a son chei di razionalizâ i coscj e, plui di dut, di programâ sul periodi lunc”. E je la rispueste che e rive dal sindic di Udin, Furio Honsell, e de assessore pe istruzion e pes politichis pai zovins, Raffaella Basana, ai citadins che, cuntune racuelte di firmis, si mostravin preocupâts pe sierade dai doi centris citadins pai zovins. In dì di vuê, di fat, si àn doi centris di cheste fate: un in plaçâl Valle del But (il Poliedro) e chel altri dilunc dal viâl delle Forze Armate (Pig) gjestîts in convenzion de cooperative Aracon. Si à po di zontâ il spazi des “Officine Giovani” dal Comun, ancje in chest câs sot de gjestion de Aracon. Par tignîju in pîts, di Zenâr a vuê, il Comun al à spindût in dut 104 mil euros. Cuntune variazion di belanç, la Zonte e à stanziât altris 65 mil euros par slungjâ il servizi fin ae fin dal an, intant che pal 2014 a son za i fonts par permeti di rivâ insom cul bant di afidament. Dentri di Novembar – e à spiegât la assessore Basana – a saran publicadis lis liniis di indreçament pal prossim bant plurienâl. Par intant si cîr di capî là e cemût che si pues provâ a sparagnâ su chestis spesis.