Contribûts par paiâ la Tia, e je fûr la liste dai beneficiaris

A son 1.001 i citadins che a varan acès al contribût par paiâ la Tia (Tarife di igjen ambientâl) pal 2012. Ancje chest an la aministrazion comunâl e à confermât un stanziament par judâ lis fameis in cundizions di disasi economic a paiâ lis spesis par cheste tarife. Lis domandis di contribût rivadis e ametudis a chest benefici a son stadis in dut 1.558, ma lis risorsis disponibilis, ven a dî sù par jù 137 mil euros, no son avonde par contentâ ducj e duncje i uficis comunâi a àn metût jù une graduatorie su la fonde des certificazions Isee. Cui che al à otignût il contribût nol varà di paiâ nuie ae Net pai servizis gjoldûts vie pal 2012, dal moment che il Comun al va a cuvierzi dute la tarife. La liste dai beneficiaris dal contribût si le cjate publicade sul sît internet dal Comun (www.comune.udine.it) e si pues viodi ancje alì dal Sportel informatîf dai servizis sociâi logât alì dal centri polifunzionâl Micesio viert al public dal lunis al vinars di 8.45 a 12.15 e il lunis dopodimisdì ancje di 15.15 a 16.45). Par vê plui informazions si pues ancje clamâ alì dal Sportel ai numars 0432 271731, 0432 271732 o 0432 271733.