Seconde aree citadine par fâ cori libars i cjans

A Udin i cjans a àn cumò un spazi gnûf dut par lôr. Cun di fat, nol è tant che a son rivâts insom i lavôrs di recupar di une aree che si à decidût di meti a disposizion dai cjans par che a puedin movisi libars cence l’oblic dal sguinçâl e de musarole. Dopo dal prin sît, logât alì dal parc citadin che al è in vie della Roggia, dongje dal implant sportîf “G. Centazzo”, cheste gnove aree si cjate su viâl dello Sport, dongje de aree sportive dal Peep Ovest. In plui dal spazi centât là che si puedin molâ i cjans, la aree e je indotade ancje di cualchi altri servizi pe cure dai animâi. La presince di une boschete e fâs po in maniere che il sît no si cjati in plene batude di soreli. L’acès ae aree al va dal lunis ae sabide di trê tal dopodimisdì a vot di sere (15.00 – 20.00), intant che cul orari invernâl i oraris a saran anticipâts di une ore (14.00 – 19.00). “Daûr di ce che si dîs intes liniis programatichis dal sindic – al à spiegât l’assessôr comunâl pal ambient Enrico Pizza – si vûl meti a disposizion par ogni circoscrizion une aree di cheste fate, pûr che lis risorsis disponibilis e il pat di stabilitât lu permetin”.