Cartelonistiche turistiche gnove intal Parc dal Cormôr

Il parc dal Cormôr al pues contâ su doi implants gnûfs di cartelonistiche turistiche che a permetin ai visitadôrs di cognossi plui a fonts cheste aree verde. Sui panei si cjate la cartografie dal jet e des rivis dal Cormôr adun cu la indicazion dai percors pussibii e in particolâr des pistis ciclabilis. Cun di plui si àn diviersis informazions che a permetin di scuvierzi lis carateristichis ambientâls de aree, a tacâ des plantis e dai animâi tipics di chest toc di Friûl. L’implant principâl al è logât te aree di acès centrâl dal parc là che a son ancje disponibilis des vuidis informativis. Un implant plui piçul si lu cjate invezit dongje de gnove jentrade che si cjate alì dal simitieri dai Riçs. La iniziative e je stade pussibile in gracie dal contribût di aziendis e ents privâts, intant che i contignûts de cartelonistiche a son stâts metûts jù dal Museu furlan di storie naturâl e dal Servizi infrastruturis dal Comun. “Dal moment che di risorsis si ‘nd à pocjis – al à dite l’assessôr comunâl pal ambient Enrico Pizza – o speri che cheste prime iniziative e puedi screâ un model virtuôs di colaborazion jenfri public e privât che al judi a promovi la rêt des cicloviis citadinis e lis bielecis naturalistichis dal nestri teritori”.