Parc Moretti, si slargje la ufierte di servizis

A cressin i servizis e lis struturis a disposizion di cui che al frecuente il parc Moretti. Cun di fat, in gracie di un contribût de onlus “Udinese per la Vita”, la aree verde si è indotade di un barachin là che si pues cjoli alc di bevi e di mangjâ e di une struture a vele che e cuvierç plui o mancul cuarante metris cuadrâts dulà che a son bancjinis e taulins. Lis dôs struturis a son logadis dongje dal splaç di ciment e a restaran alì fin che no si fasarà sù il gnûf spazi par dâ fûr di mangjâ e di bevi che i lavôrs a tacaran chest Autun. I doi servizis a fasin il pâr cul “troi vite”, une schirie di imprescj pe gjinastiche di doprâ un daûr di chel altri, che in curt al sarà svilupât dentri dal parc simpri in gracie di une donazion de onlus “Udinese per la Vita”.