Dîs incuintris tra Aministrazion e operadôrs dal cumierç
L’Assessorât comunâl pal cumierç al à inmaneât un pôcs di incuintris in diviersis areis dal centri citât e dal rest dal teritori comunâl là che al invide a partecipâ i comerciants e gjestôrs di ambients di chês areis par che a fasin indenant lis lôr osservazions e lis lôr propuestis par promovi e svilupâ il cumierç citadin. La Aministrazion comunâl e vûl cussì presentâ i siei intindiments par chest setôr, ma soredut scoltâ lis segnalazions e i sugjeriments che a rivin dai operadôrs dal cumierç. “O vin chê di tacâ il mandât vierzint daurman un confront seri e costrutîf cu lis categoriis economichis – al à spiegât l’assessôr pal cumierç Alessandro Venanzi – o speri che i operadôrs a acetin il nestri invît e si fasin viodi in tancj cun propuestis e sugjeriments”. I incuintris in calendari a son in dut dîs. Si tache lunis ai 26 di Avost alì dal palaindoor di Padier pe aree setentrionâl di Udin. Joibe ai 29 di Avost l’apontament al è a Cussignà inte sede de Cuinte Circoscrizion, là che a son invidâts ancje i operadôrs dal cumierç dai Paparots e des viis Marsala, Palmanova e Pradamano. Ai 5 di Setembar i tocje ae aree dai Riçs e des viis Martignacco, Leonardo da Vinci e Cotonificio cuntun incuintri alì de sede de Seconde Circoscrizion. Si va indenant ai 19 di Setembar cuntun apontament inte sede de Seste Circoscrizion dedicade ae aree di viâl Venezia e vie Pozzuolo. Ai 3 di Otubar alì de sede de Tierce Circoscrizion si fevele de aree di Godie, Beivârs, Laipà e des viis Cividale, del Bon e Forze Armate. Altris cinc incuintris a interessin invezit la aree dal centri storic. Si tache ai 2 di Setembar inte sale parochiâl S. Quirin (aree des viis Gemona, San Daniele, di Toppo, Moro, Mantica e Cosattini) par passâ po ai 16 di Setembar inte sale pes riunions dal Oratori de Puritât (areis di Marcjât Vieri, Sant Jacum, Domo, place dai Grans, viis Manin e Savorgnane), ai 23 di Setembar alì dal Oratori de parochie dal Carmine (aree di Borc Stazion e viis Roma, Europa Unita, Aquileia, Ungheria e D’Annunzio), ai 26 di Setembar li dal Centri culturâl des Graciis (aree des viis Pracchiuso, della Vittoria, Trieste, Petrarca e Alfieri) e ai 7 di Otubar alì dal Oratori S. Zorç (areis di Puscuel, Graçan, plaçâl Cella e viis Duodo, Marangoni e Del Gelso). Ducj i incuintris a tacaran a nûf mancul un cuart di sere (20.45).